銀行界近年持續縮減有人手嘅分行，引起社會各界關注，特別係唔多識用自動化ATM設施，又住喺縮減分行重災區──舊區嘅長者，分分鐘有錢都攞唔到嚟使。有見及此，銀行公會都想做番啲嘢──咪誤會，唔係同同業斟吓唔縮減分行，而係做番啲社區教育宣傳工作，教啲長者點樣用自動櫃員機，等佢哋識得㩒機攞錢同用其他服務。
據講，公會喺近期嘅會議上，已經提出用作教育宣傳嘅預算支出，金額大約係140萬元，年底起，佢哋會喺秀茂坪、黃大仙、牛頭角、華富、葵涌、天水圍、荃灣等社區，輪流擺展攤同宣傳。咦，咁銀行界「梁朝偉」、公會主席王冬勝，會唔會都親自落區教啲公公婆婆㩒機呢？
不過，公會傾向經費由各成員銀行攤分，雖然金額對每家銀行都係蚊型數字，但有關開支形同社會服務，講到數口始終都要均真啲，所以各銀行對分賬嘅安排，仍然要再斟酌斟酌。
請CEO專責解畫
華華又側聞，公會曾經口頭討論過，聘請一位全職CEO嘅可行性，代表公會為業界處理重要對外事宜，諸如立法會旗下嘅工作小組，若要搵人去立會解畫，回應一下銀行近年cut分行等敏感話題，就搵呢位行政總裁出面，唔使吓吓勞煩到主席親身出馬啦。
不過，呢個構思尚未正式提上議事桌，仍在醞釀及討論CEO職務細則等階段，皆因亦有業界認為，公會未必需要如此龐大編制喎！
[email protected]