銀行公會訪問團完成上海之行後，噚日傍晚繼續飛去北京，不過身為團長嘅金管局總裁任志剛，卻罕有地未有隨隊北上，而係率先南下打道回府，華華側聞，原來任總係因為「牙痛」。
人民幣業務冇進展
其實，亦難怪任總牙痛嘅，佢最關心嘅人民幣業務，即使6月溫家寶總理開晒口話研究法規，但至今仍然只聞樓梯響，國家政策要循序漸進，本港作為被恩澤試點嘅市場，只能「再坐一會」，任總牙痛，亦情有可原。
據了解，任總今個禮拜稍後又要飛往澳洲，出席國際結算銀行行長會議，所以要及早回港延醫，但年年銀公訪問團都由佢同公會主席率領，今次匆匆離隊，乃破天荒第一次，亦未免令行程稍為失色。
據聞，任總呢次牙痛源於上海，佢相當忍得，兩次喺上海向傳媒滙報行程，依然笑容滿面，即使牙痛，猶幸都「頂到」見完國務院副總理黃菊，真係總裁唔易做。
餘下行程，將由獅子行兼公會主席王冬勝唱獨腳戲，不過冬冬應該唔會寂寞，事關外資行條例正式公布，咁大個與銀行業有切身關係嘅課題，要與當局交流，應該好多發揮空間。不過，差不多年年都見公會訪問團嘅人民銀行行長周小川，現時仍身在外地，今次就無暇與一眾賓架見面，改由外滙管理局局長胡曉煉接見。
[email protected]