韓國濟州除咗有令各大劇迷喊到收唔到聲嘅《大長今》、《宮》同《真愛賭注》拍攝場地外，原來已經靜靜起革命，唔只用宋慧喬同李秉憲吸引遊客，08年仲有個主題公園落成。
噚日南韓JDC，即係好似香港貿發局一類嘅部門，同港商豪景投資主席區可華簽約，合作喺濟州發展神話＋歷史公園，份合約成26億港紙。區可華話，投放4億嘅第1期，08年8月落成，預計個公園要15年先有回報。
大家可能諗，點解無啦啦一家香港公司會同南韓政府關係咁友好，畀咁大個project佢做呢？原來以前區可華喺中電做過採購燃油同煤，後來自己開咗家公司，專門做煤出入口，當年韓國出現煤危機時，區可華挺身而出，幫咗南韓一把，亦建立咗友好關係，因此促成今次合作。
講番個公園，入面最大嘅就係ChinaTown，將古今未來嘅中國展現眼前，希望吸引中國旅客。咦，咁個公園咪要同米老鼠天地爭生意囉？