前幾日《蘋果》李八方講馬會行政總裁黃至剛臨退休晒命，評論幾任馬會主席，黃博士為人幾謙，至少左丁山得到嘅印象係咁，好少會晒命嘅，不過報紙標題梗係要有幾錢肉緊至有人睇，起碼可以吸引網上讀者閱讀，增加hitrate，等黎老闆認為寫嘅嘢受歡迎。
黃總為人公事公辦，唔記得一啲私人恩怨，估唔到就因此捱罵。有去參加今年十一月七日澳洲墨爾本盃嘅老友告知，當日跑完墨爾本盃，由日本馬包辦連贏，創下歷史紀錄。同日跑香港賽馬會錦標，獲得冠軍嘅係大衞希斯馬房嘅大熱門馬「北極熊」（PolarBear），亞軍係香港退役馬「領先者」，亦係希斯馬房嘅。頒獎禮由馬會主席陳祖澤與馬會行政總裁黃至剛主持。老友話，頒獎後，有人講粗口鬧黃至剛，至於鬧乜，佢就聽唔清楚。
老友記聽唔到啫，《南華早報》記者似有現場錄音咁款，喺十一月八日寫埋出嚟。據記者報道，「北極熊」嘅馬主叫做RodDufficy（特夫斯），係澳洲著名記者兼大賭客。特夫斯領獎後，黃總裁唔認得佢係邊一位，問佢做盛行。特夫斯即刻爆粗：「哦，好奇怪你會咁問。我以前喺香港做專業賭馬，直至你撤銷我哋嘅投注戶口，又XXX通知稅務局搵我哋為止！」
當時場面點尷尬法，《南華早報》冇講，只係話陳祖澤在現場向十萬六千人發表談話，得到好好嘅反應。左丁山一位老友記話佢以前知道呢位特夫斯係乜誰，佢與一班澳洲客賭馬好大注，往往令到一啲馬在紅燈後落飛如狂，當年引起馬會注意，取消咗佢哋嘅電話投注戶口，故此特夫斯等人匆忙走人，返澳洲搵食。點知今次事有湊巧，好衰唔衰竟然係佢哋隻馬贏咗盃賽，仲要由陳主席黃總裁等負責頒獎㖭，可謂寃家路窄。話時話，今季馬會投注額自谷底反彈，相當理想，全年應該超過六百億元，此是否與大額注碼（一萬元或以上）有回贈一成有關，馬會未有公布，睇情形，類似特夫斯呢類大賭客嘅注碼，返番嚟嘞。