香港人買賣物業，絕大部份透過地產代理，個別客人喺完成交易後，仲可以同經紀做朋友，但有啲鬧交收場，甚至鬧上法庭。喺《Uwants.com》討論區，班網民就搞咗個網上選舉，喺全港四大代理，中原、美聯、利嘉閣同香港置業之中，揀出最衰代理，結果係，美聯高踞榜首。
美聯得97張票，佔超過61%，宿敵中原今次落後好多，僅31票，佔近20%，至於利嘉閣同港置，分別有18同12票，各佔11%同8%。小愉兒：「我個人覺得施生嗰邊好啲，唔知你哋點睇呢？」wavebreaker就話：「allfour都衰。」佢咁嬲，唔知係咪畀班代理呃過呢？飛機師就將中原句slogan「你所委託，我必承諾」改做「你所委託，例必老作」，亦反映出佢嘅心聲。
做過地產經紀嘅owonlui話：「其實4大代理又咪嗰啲人，我4間做過3間。」wii同意：「我買咗間屋都未收樓，個經紀已經過咗檔。」areyouangry都好贊同呢個講法：「間間都咁衰，其實四間嘢，都係兩個公司，啲人都係走嚟走去。」
經紀流失率高
不過，有啲網友就唔同意揀邊間代理衰，認為經紀本身操守問題，同公司無關。準時交租人話：「地產公司反而唔係問題所在，問題在於地產經紀既質素。佢地無乜專業訓練，只係考牌就做得，好多只係向錢看，是否專業同以客為尊就真係好個別。」