近幾個月大市升到humhum聲，但有啲恒指成份股就踢極都唔郁，直到上星期指數挨近19000點，呢啲昏睡百年嘅股份終於有反應，豈料一升就惹起藍燈籠恐慌。呢個藍燈籠排名榜，電訊盈科（008）應該穩佔榜首位置。隻股噚日收報5.07元，升3仙，散戶點睇？
「香港討論區」內，Mel-mel引述花旗嘅報告，該大行對電盈維持「買入」評級，目標價6.05元。aryung9828對呢份報告嗤之以鼻：「又係花旗？唔阻佢嘞，叫佢買多啲啦……仲要睇路呀！」
wing100000wing大惑不解：「點解咁多人爭住要電盈？」
baseman098反應激烈：「呢個世界大把股票，無謂費神。」
提起電盈，好多小股東都欲哭無淚──高位買入嘅，𠵱家沽貨，執埋唔夠攝牙罅，揸住佢又愈睇愈心噏。噚日「名家教路」版嘅曾教授，亦撰文大呼「對電盈已冇感覺」，仲教小投資者學佢咁，將電盈股票轉成自己嘅名，留番嚟自我警惕。
6蚊筍價？見仁見智
電盈近排因為股權轉手問題而頻頻見報，梁伯韜財團出價每股6蚊收購盈拓所持電盈股份，雖然作價合理，但呢單交易無論通唔通過，對揸住一籮籮千年蟹貨嘅小股東嚟講，分別都唔大，反正6蚊呢個「筍價」，同佢哋嘅家鄉價相距十萬八千里，就算收購唔成，股價跌番落四個幾，損失都係咁上下。
不過，如果冇蟹貨喺手，電盈現價有短炒一轉嘅價值。隻股上星期三以大陽燭配合大成交升破降軌阻力，保歷加通道由收窄變撐闊，MACD由熊牛訊號轉為雙牛訊號，近幾日正處旗形整固形態，一旦整固完畢，可望上填7月初下跌裂口5.25至5.55元，然後挑戰5.80元高位，但如果跌穿4.80元就要先止蝕。
余文