港股上到19000水平，好淡爭持好激烈，走勢亦大上大落，恒指噚日升過120點，但亦跌過100點，收市好友贏短馬頭，升9點，期指則高水21點。
大市個別發展，大有大玩，細有細玩。兩大藍籌中移動（941）同滙控（005）分路走，中移動升1.05元，滙控則跌2.20元。中資銀行股除交行（3328）要唞氣外，其他全部上升。
細股有確利達（1224）玩大插插，噚日午市一開就見到里昂10幾球貨連插幾個位，跟住就咋一聲散咗。成個下晝，主要係里昂同一兩個牌沽貨，一個柯打就5球，但有大買家在0.36元水平硬接，里昂沽咗起碼兩三億股，大買家至少接咗三四億股，今次大轉倉，沽嘅Happy，買嘅仲開心，轉完倉後，前路冇咗障礙，日後升得仲舒服。
難得有大轉倉，確利達可趁低吸，下一個浪，升5成不為過。另外，上升股有340隻，金威集團（910）唞一唞後，呢兩日又再大步向前行，噚日收0.86元，升2仙，又創今年新高，可繼續以上移止賺位持有，年底前有機會見1字頭。
上月初推介浩倫（1073），當時股價0.57元，月中升上0.91元，升幅近60%，之後出現調整，業績宣布後借勢「坐一坐」，噚日又再升過，高收0.88元，升14.2%，走勢再現突破，MACD亦快有「雙牛」入貨訊號，照度上去，好快見1.20元，預期升幅36%！
預測PE僅5倍
業績見光後股價跌，只係因為冇息派，盤數則靚到痹，06年度（6月年結）營業額22.86億元，升39.34%，獲利6162萬元，大升186.5%，每股盈利14.62仙，往績PE只係6倍；股東資金4.17億元，每股NAV0.99元。
浩倫「晒士」雖小（以市值計），但生意好大，仲食正中央未來兩三年大力扶助農業呢個浪，現年度，每股盈利保守估計可升2至3成，預測PE只係4至5倍。
郭兆誠