醜婦終須見家翁！8號仔買家番薯梁前日終於將財團名單開估，結果，超人真係瞓身參與，喺荷包攞40億畀第3個仔（佢個慈善基金）買第2個仔（小小超）啲電盈股份之餘，仲幫番薯畀少少，而8號仔第二大股東網通亦唔輸蝕，請槍搵西班牙佬代買8%，諗住唔覺唔覺為自己（其實即係阿爺）完全染紅8號仔鋪路，對於呢個充滿父愛同埋咁有政治色彩的金鋼組合，想為小股東做啲嘢的二少未有意見，反而立會辣妹劉慧卿就好火滾！
卿姐話，暑假嗰陣二少諗住賣畀出到好價嘅麥格理或者新橋，但網通發爛渣唔准「香港人管理」嘅8號仔落入外資手中，仲要搵新華社幫佢出稿，出口術兼出手，但一個屈尾十，買家名單上面就有西班牙電訊同佢自己呢兩件唔係香港人嘅「外資」，咁即係阿爺只准二少賣畀佢哋鍾意嘅外資啦，成件事凸顯咗咩？咪中央點介入香港嘅商業行為囉！最慘係班小股東，當初仲以為有好消息，𠵱家就算二少拎13.8億出嚟派息都補唔番！
辣妹：對李生要公平
至於本身已經有電訊業務的超人，用基金名義入股有冇違反市場競爭？根據特區政府所講係冇，卿姐亦話，未三口六面講清楚就定結論，對李生係唔公平嘅。佢又話唔係要針對大小李生，只係香港作為國際金融中心，每樣嘢都有法可依同埋保障小投資者利益啫，更重要係李生嘅影響力已經好大，唔係點會咁多人話香港係「李家之城」……唔知超人下個禮拜四夠唔夠膽帶埋番薯同網通啲代表，去立法會同卿姐解釋點解係都要買8號仔呢？
[email protected]