「豪宅」本來係尊貴身份嘅象徵,但今時今日呢兩個字,就用得好濫,事關10個樓盤,有8個都話自己係豪宅,聽都聽到大家麻木晒,而網友們亦對呢類新興豪宅議論紛紛。
Antia_block喺《香港討論區》就為呢類豪宅落咗個新定義︰「新豪宅咪係啲高層好豪,低層中產,隔籬街就係地盤佬、工廠佬、街市佬嘅地方嚟……」
網友LittleTomato好同意Antia_block嘅講法,仲舉例︰「工廠區的豪宅──爵悅庭;舊區中的豪宅──翔龍灣;偏遠地區豪宅──御皇庭。」
kwchan就認為,現時豪宅嘅定義只係單位呎價較全港平均呎價高於特定水平嘅住宅。至於DT1025就演繹得更加傳神,佢話︰「豪宅=您有多餘錢『豪』畀發展商嘅住『宅』。」
廣告無厘頭
講講吓,大家又將話題轉到新豪宅嘅廣告,I_am_Chris話︰「啲廣告直頭唔知佢想點!成分鐘廣告,幢樓見得半秒,又冇地址、區份,九龍定港島都要靠估。買樓單睇呢啲就死硬,唔通架直升機有樓盤個名,飛足一日又會多好多人去買?」
shawnseit大表贊成︰「係啦,淨係香港先有,賣樓廣告會唔講地點,即係佢哋都shameof佢哋個location。」
聽落班網友都講得幾有道理,其實真正豪宅又使乜搞咁多花臣,好似山頂道、施勳道嗰帶嘅屋苑,好多都簡簡單單用番個街名就算,反而係嗰啲豪唔起,又要扮高檔嘅樓盤,先會搞鬼死咁多嘢。