5年前中國入世，5年後輪到越南，其實上月底世貿工作組完成最後一次會議後，已隨即宣布等11月7日嘅日內瓦會議確認，有睇新聞一定會知，甚至入定貨炒越南概念股如陸氏實業（366）。
嚟緊星期五，喺河內舉行APEC會議，到時美國總統布殊、國家領導人胡錦濤以及俄羅斯總統普京等世界級領導都會出席。其實唔使等到星期五正式開幕，因為噚日已經開始咗高官會議，嚟緊幾日仲有滙集全球跨國企業巨頭嘅商賈會議陸續開幕，要炒越南概念，係時候入定貨。
噚日市場焦點仲係中資金融股，H指由跌變升，好大程度係靠幾隻大型中資金融股力撐。人民幣續創新高係原因之一，但係中資地產股唔多升，似乎金融股升得另有原因。
5年前中國成功入世，過去5年亦都係國內銀行受保護嘅蜜月期，到今年12月，根據中國對ＷＴＯ作出嘅承諾，中國對外資銀行所有限制將被取消。外資一時間未必可以全速湧入中國市場，但係較早前廣東發展銀行併購戰，最後由花旗勝出，係一個開始。
光控快見7字頭
持牌銀行頓時「奇貨可居」，尤其有番咁上下規模嘅商業銀行，吊高嚟賣都仲得，因此交行（3328）同招行（3968）升到你唔信。年底前，光大銀行亦要繼續重組，令到資本充比率等數據符合要求，明年上市係事在必行，睇嚟光控（165）好大機會可以破7.33元頂位。
歐陽風