中資金融股噚日大發神威，國壽（2628）升4.2%，財險（2328）升3.8%，5隻喺香港上市嘅國有商業銀行股中，交行（3328）表現最標青，單日爆上6.65%，其餘4隻平均都有3%進賬。噚日咁升法，最開心嘅相信係中行（3988）同建行（939）捧場客，呢對孖寶近幾個月遠遠跑輸同業，揸咗貨嘅散戶戲稱之為垃圾股，𠵱家垃圾變寶，散戶飲得杯落。
噚日講到有中行散戶喺上星期五臨門一腳碌落車，分享唔到中行染藍嘅利好消息，今日輪到講建行。隻股噚日收3.78元，升12仙，有散戶趁反彈清倉，會唔會早得滯？
《香港討論區》入面，網友zyzzve噚日中午休市時段上網留言：「今日喺$3.7沽晒939，終於鬆晒。」另一網友「股估怪怪」好唔明：「點解咁早放？中資銀行隻隻升到澎澎聲！」其他網友Mel-mel、cyber88boy、pook4330、tke666同js0201亦認為佢沽得太早。
不過亦有人認為佢做得啱，「亨利哥哥」話：「炒都炒招行（3968），建行業績倒退。」
建行舊年10月掛牌，上市以嚟，除咗頭嗰5個月升過一浸外，之後一直喺3.2至3.7元之間橫行，足足吽咗8個幾月，噚日以大陽燭一舉升穿橫行區，MACD同RSI同步向好，保歷加通道亦向上撐闊，圖表上好靚仔。短線喺今年2月高位3.85元附近有少少阻力，但相信唔難突破，一旦升穿就海闊天空。睇幾多？真係幾難量度，不妨參考以下例子，自己計計數。
基金要觀察一年
國壽03年底上市，04年頭至05年中一直喺3.8至6元左右橫行，足足牛皮咗一年半，之後愈升愈有，噚日最高見17.9元。
交行舊年6月上市，之後喺3.1至3.575間橫行咗5個月，今年1月爆上，噚日最高7.25元。
中銀香港（2388）嘅例子噚日講過，唔再重複。點解新股上市頭一年多數打橫行，之後忽視爆升？相信係因為基金喺第一年仍處觀察期，一旦業績對辦，基金大手入貨，股價自然升到你唔信。
余文