最近上海警方偵破一家中國最大炒金公司非法進行期貨交易，正待刑事起訴，據內地媒體報道，原來涉及香港金銀業貿易場會員之一嘅聯泰金號。華華噚日曾嘗試聯絡聯泰香港辦事處，但冇人接聽電話。
據上海《東方早報》報道，呢家上海聯泰黃金製品，喺全國15個大城市設點，但被發現喺上海非法經營期貨業務，又虛報註冊資本，04年5月報稱為400萬元（人民幣．下同），至今年4月，已增至3000萬元。而據上海證監會調查所得，佢哋嘅行情數據，表面上睇跟國際市場走，實際上並非完全同步。聯泰喺內地共有客戶700多名，累計收取投資者保證金6000多萬元，合同交易總額高達108億元，客戶平倉虧損達2000萬元。