昨日個市埋單計數跌咗22點，成交就進一步增加到接近580億元，跌市大成交咁咪好弊？唔使驚，睇走勢唔好咁死板，恒指「先低後高」，守穩條10日線，大成交當好睇。
唔好淨係睇恒指，睇吓H指你會有完全唔一樣嘅諗法，升咗149點，破埋8000關，即係話大市整固，啲錢就走咗去炒國企，大成交支持H指創新高，師傅教落，「成交走喺指數前面」，即係話H指仲會升。
啲國企股咁威猛，乜嘢股份最醒，梗係大強勢嘅銀行股同埋跟上嚟嘅保險股，工行C輪9909升咗24%，工行（1398）升到3.77元，睇個勢，今日升得仲勁。交行（3328）同國壽（2628）都有唔少捧場客，仲會有得去，啲輪唔使咁快沽。
港交所C輪3682：除咗啲國內銀行股可以炒之外，仲有啲乜嘢股有得諗，介紹隻個市升同跌佢都會升嘅股票畀大家，就係港交所（388）。港交所嘅收入來源有好多瓣，但係最緊要都係喺個市抽佣，連續兩日成交過500億元，唔嘢少，啲成交睇嚟唔係虛火，相信好快會過600億元，你話港交所係咪肥仔呢？雖然7月收窄買賣差價嘅時候成交縮減過，但係𠵱家睇嚟影響好輕微，一於買啲C輪，正股短線可破70元，揸耐少少，睇75元樓上。
C輪3682昨收86仙，槓桿率7.6倍（有效5.9倍），對沖值0.79，正股升上70元同75元，隻C輪應該會喺1.20元同1.65元樓上，正股跌穿62.80元止蝕。
另1隻C輪9766引伸波幅大啲，都可以諗吓，昨收74仙，正股升上70元同75元，9766睇1.10元同1.55元，止蝕位一樣。
俊樺