政府早前提出資助全港約18,000部屬歐盟前期型車輛嘅車主，將車輛更換為至環保嘅歐盟4型車輛，；跟住又話要削減喺旺區行走嘅專利巴士數目，甚至限制歐盟前期型巴士行走旺區，以求改善空氣質素咁話。
呢兩個建議聽落好似幾好，但成效又係咪真係咁大呢？好似前者話資助車主換車，資助金額太少，對高昂嘅新車價嚟講根本係微不足道，太高又會惹來社會輿論壓力；後者就仲好笑，乜巴士公司唔將嗰啲歐盟前期型號嘅巴士行走旺區，而去行走人口較疏落嘅地區，甚至係郊區，又真係可以解決空氣污染呢個問題咩？
改善香港嘅空氣污染問題，首要任務係限制建築物嘅高度，以免影響空氣流動，並且提高罰則，加重對排放過量廢氣車輛嘅刑罰。至於巴士，除咗巴士公司要加強檢查旗下車輛嘅健康情況，甚至要花多些少錢去幫一啲歐盟前期型號嘅車輛，改用符合歐盟4型標準嘅引擎或有關設備，呢個唔係一個更可行嘅方法咩？
記者：鄭達基