人民幣兌美元近期幾乎日日創新高，而中資股亦乘勢抽高，H指近幾日真係升到你唔信。昨日開市恒指下試18700支持位，但H指未受影響，直衝8000關，最後大升149點，收8064。恒指受H指帶動，跌幅亦由早市最多的173點，收窄至只跌22點收市。
一石二鳥好使好用
不過，H指昨日升勢集中在4隻重磅金融股，交行（3328）、國壽（2628）、建行（939）及中行（3988）共向H指進貢138點升幅，佔H指總升幅高達9成，升勢屬側埋一邊。隨着建行、中行、中石化（386）等大型國企紛紛加入為恒指成份股，日後大戶做嘢更加方便，好似昨日一隻建行，已分別令H指及恒指上升30點及19點；相反日後要質散個市，亦可一股兩用，難怪近日成為大戶瘋狂收集的目標。
昨日早市在3.65元買多4萬股工行（1398），結果工行亦係升到你唔信，以3.77元收市，升逾3%，工行點計都係第37隻恒指成份股，睇嚟好快會見4元。倉內10萬股工行平均價約3.61元。
至於美聯（1200），昨先高後低跌穿4.10元，按部署在4.10元止蝕。由美聯走勢之反覆，反映近期炒股要炒得更短，見好就收。
中石化昨先高後低，但仍升0.08元，收5.73元，仍未跌回部署的收集區，暫不打算高追，等候低位收集。
趙飛雲