近日，喺《香港討論區》內，有一個05至06年度全港最衰銀行網上選舉，結果滙豐被網友形容為以壓倒性的姿態勝出，勇奪首名，其佔總投票率近五成，而緊隨其後係恒生（佔25%）、中銀香港（佔15%）及渣打（佔7%）。
網友塔利班戰士話，非常唔滿意滙豐，諗住佢貴為全港最大間嘅銀行，理應櫃員機應該最多，但偏偏就減吓一間又一間，喺旺位見中銀都唔見佢；所以，𠵱家嗰滙豐戶口除咗用嚟出糧、「㩒」錢同埋抽IPO，基本上都冇咩點用，喺銀行見到條人龍就驚，不過老人家就慘啦。佢提議其他如果要常用櫃枱服務，不妨揀中銀，收費平啲，人都少啲，地方又就腳。
多人幫襯投訴自然多
不過，Tonyy就指出，中銀都未必次次都咁少人排隊，有次佢就排隊排到出門口，足足等咗成粒鐘。至於滙豐嘅兄弟恒生，就被網友批評收費貴，利息又低，服務態度變差。所以，hk1618hk就話永隆好用，覺得「平靚正」，服務好，又少人排隊。
而網友白白淨淨就話，滙豐嘅服務都唔係咁差，只係衰「食水深」，好似外幣滙價；佢仲指今次銀行選舉有所誤導，因為大部份人都無可能用過晒咁多間銀行，咁又點分邊間好，邊間唔好；以小市民嘅心態，一定會話自己用緊個間唔好，所以最多人用個間銀行就一定係最多人話唔好。而且，如果滙豐真係咁差，又邊度有咁多人去幫襯？因為貪佢夠大及可靠。
但lsk_grey就從另一個角度睇，如果多人用嘅銀行，又有咁多人都唔滿意佢哋嘅服務，咁間銀行就真係好有問題！