香港仍為未來發展嘅定位大傷腦筋，廣東省早就為中長期發展制訂策略──提升產業結構，由輕工轉向重型工業發展，以及大力發展西部經濟。大珠三角商務委員會噚日就此發表兩份研究報告，希望協助港商，認清廣東最新發展形勢，從中找尋商機。
委員會主席馮國經建議，好似𠵱家廣東大力拓展汽車業，香港可以利用其國際網絡，協助採購汽車零配件。又如廣東積極發展西部經濟，港商可尋找當地嘅工業和基建投資項目，藉此發展中國大西南市場。
至於廣東發展、香港好少觸及嘅重工業，佢認為香港仍可在專長嘅會計、金融、物流行業上，加以適應配合重工業的需求。咁即係香港要跟住廣東走？可能馮生諗住扯住阿媽衫尾走實冇死。
該會成員之一嘅董建成建議配合廣東西部開發，香港應該加強同粵西嘅基建、人流和物流上暢通。喺另一個泛珠三角研討會上，廣東省建設廳廳長勞應勛就話，近期珠三角基建重點，為設立京廣客運專線，並南延至深圳和香港；建設深港西部通道．．．都係冇乜新意，立法會聽日會討論點樣同泛珠三角合作，睇吓有冇新點子。