港股在高位爭持,國企就繼續上,恒指收18868,跌22點,期指就升47點,低水收窄到只有4點,H股指數大升149點,高收8064,果然輕易就衝破8000大關。
大市成交576億元,有恒地(012)同雅居樂(3383)兩隻做「披成」嘅加埋已接近100億元。中資銀行同保險股一枝獨秀,5隻內地銀行股成交計埋又成120億元,交通銀行(3328)最勁,高收7.22元,大升6.6%;3大內地保險股仍然係中國人壽(2628)最突出,再升4.2%。
中資股氣勢如虹,近日失驚無神被花旗睇淡嘅海油化學(3983)亦止跌回升,由低位3.07元彈上3.19元收市,升9仙,短期一衝破10日線同降軌阻力(約在3.25元水平),調整可確認完成,升浪再展,量度上升目標指向4.35元。
海油化學係內地最大嘅氮肥生產商之一,過去3年盈利均錄得高增長,04年(12月年結)增長426%,05年增長31%,06年預測盈利14.6億元,增長55%,每股盈利不少於0.324元,預測PE9.84倍。
高增長自應有高PE,海油化學值12倍PE不為過,股價已可見3.90元。事實上,國際同內地嘅同類股,平均預測PE係18倍,本港上市嘅中化香港(297)係17.3倍。
有注資及高增長概念
中化香港市值181億元,海油化學內資股同H股合計46.1億股,市值147億元,兩者「晒士」差唔多,未來亦同樣有注資同高增長嘅概念,一拍埋比較,海油化學股價實在有好大上升空間。
除積極併購外,集團亦已研究推出新系列的複合肥和BB肥,以爭取更大的市場佔有率,目前正與策略股東挪威YARA集團洽談合作細節,預計07年投產後,盈利可進一步提升。
郭兆誠