美國貴為全球頭號富裕國家，但貧富懸殊問題日益嚴重，據英國《衛報》報道，美國有3700萬窮人，佔全國12.7%人口，即十個美國人中起碼有一人生活在貧窮線以下，這比例是所有發達國家中最高。喺《MSN》討論區，有人問點解貧者愈貧，富者愈富？
Mia-07將矛頭指向政府，佢話美國政府偏幫有錢佬，情況較近代其他國家有過之而無不及；當地富豪如果要維護本身利益，可以用好多方法游說政府，情況就好似合法嘅賄賂一樣。啲窮人由於讀書少，唔識點樣爭取利益，俾啲有錢人「大石砸死蟹」。
網友Graphix猛呻呢個世界唔公平，佢話：「資料顯示美國最有錢嘅1%人口，擁有全國近四成財富，但佢哋只係承擔三成半嘅稅款；至於最窮嘅四成美國人，只擁有全國1%資產，反而要承擔近一成稅款。」
investor-bob就認為唔應該怪晒政府，佢話美國遍地黃金，有好多機會畀啲窮人同中產階級食大茶飯。美國有啲弱勢社羣無所事事，成日飲酒同吸毒，冇為自己定下人生同事業目標，所以佢哋咁窮，係自己攞嚟衰。Wastingthyme1就好有慈善心腸，認為人人如果好似全球首富──微軟老闆蓋茨（BillGates）咁，將好多身家捐畀社會，咁呢個世界就會更美好。