導演李安前日去咗上海為電影《色，戒》睇景，佢一日到訪五處地方，除咗上海郊區小城鎮外，仲鎖定市中心嘅老樓房為內景地。老樓房雖然仍維持40年代嘅風韻，但因為加咗唔少如空調嘅現代工業產物，所以李安就要工作人員重新改造呢啲樓房，而佢都有現身監督。由於李安仍然喺上海趕戲關係，所以月尾應該唔會返台灣出席亞太影展同金馬獎頒獎禮。