由泰北來港的阿芳，在同心泰國菜館做了5年，每日都是朝早7點返到舖預備煮鴨湯的材料，不到11點鴨湯香味已經傳到對出的巴士站，中午時分，很多來幫襯的食客都是為了一嚐阿芳的手勢，「我每晚會留起啲鴨湯做湯膽，第二日再加新料用文火熬，咪咁香囉！」湯底加入了鴨骨、花椒、八角、桂皮等，要熬上4個鐘，是阿芳在香港其他地方打工時學番嚟，加上日子有功，才煮到現時的味道。
最忙是午市，阿芳可以淥近百碗粉，簡直一分鐘都無得停。小記喺下午3點幾訪問，阿芳都要忙到一邊做訪問一邊工作，收到單後左手淥料右手切料，最後將鴨湯倒入碗中。廚房熱氣騰騰，叫阿芳出去歇一歇，轉過頭又有Order，阿芳話︰「最緊要客人食得開心。」小記都唔執輸食番一碗，鴨湯顏色深，入口味道香濃，難怪阿芳做到唔停手啦！
記者︰方綺君 攝影︰楊錦文
鴨肉湯鴨肉金邊粉
$20/一餸 $25/兩餸
招牌鴨湯底入口香甜，配搭金邊粉或河粉最佳，午市見到每枱人人都Order一碗，阿芳煮湯的手勢居功不小。
蒜茸炸鯽魚$48
鯽魚起肉，骨唔會浪費一齊炸，脆到咬落卜卜響，是一貫泰式混合香茅、胡椒粒和香料的攻鼻味道，點些自家製的酸辣汁增加刺激。
同心泰國菜館（23836983）
地址︰九龍城打鼓嶺道5號