陳小春前晚去咗重慶參加冰純嘉士伯音樂釋放Live歌友會，唱咗《劫數難逃》、《神啊，救救我吧》等幾首代表作，現場觀眾反應熱烈。小春唱到中途，突然有位女歌迷衝上台，遞咗支礦泉水畀佢，當時小春好有風度，諗住接過支水，可以繼續唱歌，點知個女歌迷唔肯落台，突然攬住小春係咁錫佢塊面。見慣大場面嘅小春都俾呢位女歌迷嚇親，不過台下觀眾就睇得好開心，仲尖叫贈興。呢位女歌迷得米後，未等保安上台已迅速走人，小春也顯得一臉無奈。
提舊愛搞氣氛
後來小春又覺得歌迷坐喺度聽佢唱歌冇乜氣氛，所以提議同歌迷互動，有位女歌迷提到張栢芝，小春就話：「你說你長得像張栢芝？」然後又指住坐喺附近嘅男歌迷話：「他長得像謝霆鋒，你趕緊嫁給他呀，然後趕緊回家生小孩！」同栢芝傳過緋聞嘅小春，講呢番話時似乎有啲酸溜溜噃！