Game事撻:微軟明挑PS3機能 血花逼真揸槍變電鋸大屠殺

Game事撻:微軟明挑PS3機能 血花逼真揸槍變電鋸大屠殺

萬眾期待嘅PS3終於打到嚟!好多人仲成皮嘢捧部水貨返屋企供奉,宿敵微軟點會任由對手攞晒彩?未計嚟緊嘅《藍龍》同《DOAX2》,單係呢款《GearsofWar》就足以踩場挑機;揸槍喪射唔在講,近身更可德州殺人狂上身,用電鋸鋸爆敵人,全程血花四濺逼真到爆,明為XB360Showoff之作,製作人仲寸到話PS3機能不足以移植㖭!
文:陳福榮

腌尖網站評最高分

絕非誇大,《GOW》呢款「第三身射擊」能討好玩慣槍Game嘅外國人,肯定有其原因,否則Gamespot又點會畀今年最高嘅9.6分過佢吖!而佢喺IGN同GamesRader都分別得到9.4分同10分,向來鍾意雞蛋裏挑骨頭嘅佢哋都畀咁高分,無論點唔啱玩都唔會係垃圾啩?講番隻Game,你可以當佢係傳統FPS(主觀射擊)嘅進化版本,有啲似《Bio4》咁望住主角個背脊嚟行動,唔單只前後移動時會有較大嘅臨場感,做各種特殊動作如挨住掩護物,又或跨過矮石等更似足睇戲!呢種設計喺過往嘅FPS真係完全搵唔到,可以肯定成為未來射擊遊戲嘅標準。

●唔單只人類呢邊,就連邪魔外道都識揸槍。

●喺第二關應付成班狂徒之際,直升機都會幫拖射吓卒仔。

●遊戲中呢類瘋狂噴血嘅場面屢見不鮮。

●進入瞄準模式就似足《Bio4》。

賤賣鮮血鋸人唔使本

若論與別不同處,《GOW》最有趣當然係嗰支同時可以當鋸用嘅機槍!但並非隨時都可發動電鋸攻擊;首先㩒住B掣舉起支槍當鋸嚟用,當走近敵人就會自動劈落去,劈到鮮血狂標唔死一身潺,但用鋸途中假如被人射中就會即時中止,兼且短時間內唔可以再拎鋸,喺衝鋒陷陣之際確實用途不大。當然如果你好鬼鼠咁深入敵陣,趁人哋唔為意兜頭劈落去,嗰種快感真係難以用筆墨嚟形容!遊戲系統基本上都同一般FPS分別唔大,喺武器方面似乎更因強調電鋸槍而刪至僅得4款,有人話唔多夠喉喎,但好老實係人都會拎支電鋸嚟玩啦,整咁多槍咪又係嘥氣。

浴血四重奏

●首先按B掣高舉支電鋸槍

●然後兜頭兜腦咁劈落去

●咁俾人鋸法,點會唔標血?

●最後成個畫面花晒,埋單!

遊戲引擎見真章

過往兩集《Unreal》全球大賣,令遊戲連開發引擎都賺大錢,因此UnrealEngine3由推出至今一直廣被廠商支持,至少Konami響PS3隻《CodeArms》都係用佢嚟開發。所以《GOW》無論喺敵我雙方一齊搏緊命嗰陣,抑或拒絕使用播片、完全由實時運算嘅過場畫面都勁到癡線,最令人印象深刻就係向前狂跑嗰個動作,突如其來嘅視角轉換非常順滑,暫時冇其他作品做到佢咁正斗!亦因為佢嘅貼圖同多邊形令場景做得好靚,好有實在感,配合720p輸出經已靚過晒PS3𠵱家嗰批同樣用上720p嘅遊戲,就算拍埋1080i/p亦唔見得好輸蝕,所以「XB360冇PS3咁靚」呢句話真係完全唔啱!視乎間廠嘅功力有幾高啫。

●除咗頹垣敗瓦,甚至連洋房大屋都係戰場。

●無論光源、仔細程度以至貼圖穩定性,都係XB360最高水平。

PROFILE

遊戲類型:動作+射擊
對應機種:XB360
開發廠商:MicrosoftGameStudios/EpicGames
遊戲人數:1至2人(連線8人)
行貨售價:$299

售賣點:I-Gamer(27253338)
地址:深水埗福華街福仁商場G16號舖