去泰國，響街頭街尾見得最多的美食一定是串燒，聞到燒烤味已經流晒口水。喺香港的廟街，最容易搵到打冷、煲仔飯或者尼泊爾菜，但最近又有多個選擇，就係新進駐的「泰串」，一聽個名已經知道主打泰國美食，屬少有的泰菜館踩入廟街，一於用泰式串燒吸引你。
記者：方綺君 攝影：楊錦文
港人鍾意食串燒
老闆之一嘅Fanny曾經有多年在飲食集團工作的經驗，清楚知道香港人口味，「夜晚到九龍城行一轉就知，周圍都係泰菜館，而且間間都逼滿人，就知道香港人有幾鍾意食泰國菜。」的確，香港人對味道濃烈的泰菜有一份鍾愛，攻鼻嘅胡椒味、辣到噴火嘅冬蔭功，當然少不了泰式串燒。店中嘅泰籍廚師阿Tu話︰「泰國串燒比起香港嘅味道更濃，醬汁更惹味。」就係睇中廟街冇泰國菜館，所以Fanny決定於廟街開舖，而且佐敦區是遊客區，不愁無客源。
大火收肉汁又香又軟
講起串燒，阿Tu就滔滔不絕︰「基本上任何材料都可以串燒，不過泰國家禽多，而海鮮通常用來做冬蔭功或加香料炒，所以通常都係串燒雞、鴨及豬等。」阿Tu話響泰國同朋友叫一打串燒加杯啤酒，已經可以消磨一個下午。細細間嘅店舖開業只有個多星期，所以串燒款式並不多。不過我食嘢重質不重量，好食就得，阿Tu同我講燒串燒火候太大或過頭的話，肉質好易變亁，到時同食香口膠咬唔爛無分別，所以記得見好就收，即見大火將肉油收好後即轉小火再燒，增加香味和串燒獨有的焦味。送入口中的串燒不但香味撲鼻，咀嚼時仲有油漏出嚟先至正呀！
泰式香葉辣椒炒海螺$55
先用泰國的辣椒膏起鑊炒香，未上碟已經聞到嗆鼻的辣味，海螺切片後加入香葉和其他香料同炒，海螺彈牙，辣度十足。
泰式炭燒沙嗲（雞、牛或豬）$48/半打
正宗泰式炭燒串燒，雞肉、牛肉和豬肉分別用師傅自家的醃料醃製，再用大火燒烤，食時要點些用紅咖喱、花生碎和香料調製的沙嗲醬，更惹味。
泰式炭燒雞軟骨$45/半打
在嘴裏細細咀嚼，可以感覺到軟骨中透出來的雞肉風味，經燒烤後，軟骨中的油份逼出來，入口又有啖啖雞油香。
泰式串燒鴨胸$45/半打
泰國家禽多，除了雞，鴨串都很受歡迎，鴨胸肉脂肪含量最低，肉質也相對細膩。略醃後就可以燒烤，先以大火鎖住肉汁再用慢火燒便是要訣。
海南雞$80/半隻
每隻雞都用三斤重嘅黃油雞以保持肉質嫩滑，伴食的醬汁以甜豉油、酸辣汁和薑茸再加工調味，香味特別濃郁。
鮮菠蘿紅咖喱雞$58
咖喱是即叫即做，用蒜茸爆香咖喱膽後再落椰奶、香葉等調味，因為不斷攪拌，所以入口好滑，又不太辣。
泰式原條燒魚$75
加州鱸魚洗淨去內臟，用泰式方法在魚身內塞滿香料、香茅、蒜茸後在烤爐上燒熟，入口外脆內滑，香料又不會蓋過魚味。
食客有Say
搵食攻略
泰串（22648383）
地址︰佐敦廟街28號地下
營業時間︰星期一至六12:00nn-3:00am；星期日3:00pm-1:00am
座位︰約40個
交通︰佐敦地鐵站A出口，右轉後步行約5分鐘。
人均消費︰$50-$60
