周日皇家馬德里憑住前鋒雲尼斯達萊嘅大四喜，作客贏奧沙辛拿4:1，𠵱家「雲佬」仲以8個聯賽入球，同廸亞高米列圖、簡路廸及朗拿甸奴暫列射手榜1哥。唔知曼聯領隊費格遜睇完呢場直播之後，會唔會因為放走呢位荷蘭前鋒，感到汗顏呢？
加維臣李華度齊入3球
睇番曼聯自雲佬離隊後，今季入球能力都冇乜問題，𠵱家喺英超聯以27球成為攻力最強球隊，比起次席車路士仲要多5球。除咗前線嘅朗尼同沙夏繼續有貨賣之外，連老將蘇斯克查、後衞尼曼查維廸及里奧費廸南等都不時入吓波，所以冇咗雲佬暫時都未睇到啲影響性。
雲尼斯達萊今次威威大四喜，原來係今季4大聯賽當中首位喺一場比賽入面連入4球嘅球員。講開帽子戲法，周日除咗雲佬入凸咗1球之外，蘇超嗰面都有球員連中三元，不過係球迷估都估唔到嘅些路廸中場加維臣。呢位前皇馬球星協助球隊作客贏聖美倫3:1，又係憑佢一個人開「客勝」。
希臘甲組聯賽嗰邊仲誇，近年被球迷遺忘晒嘅前巴西球王李華度，同日幫奧林比亞高斯主場大炒阿波羅5:0，李華度又係大演帽子戲法，仲幫球隊保持榜首位㖭。
「總括周日最威嘅係30歲或以上嘅球員，雲佬大四喜、加維臣罕有地連中三元，最開心係34歲嘅李華度都仲老而彌堅，希望個個禮拜都咁多人入波就好喇。」