恭喜！恭喜！張智霖（Chilam）與袁詠儀的愛情結晶品終於在昨晨誕生，由寧波車擇定吉時，靚靚昨日在山頂某私家醫院剖腹誕下一名重八磅多的男嬰，現時母子平安，初為人父的Chilam表示初次抱住孩子的一刻，心情異常激動。
現年35歲的袁詠儀（靚靚）一直渴望成為媽咪，她與張智霖相戀14年，今年初終於夢熊有兆，為了安心養胎，靚靚將手頭上的大部份工作放下，專心等待孩子出世。
全家興奮
「開刀生完仲幾攰」
原本靚靚的胎兒預產期是本月底，但據悉一向篤信密宗的靚靚，之前曾找寧波車為孩子擇吉日出生，所以她才選擇昨日入院剖腹生產，而張智霖更陪伴妻子一起進入產房，親睹愛兒出生的一刻。昨日記者分別致電恭喜這對父母，靚靚在電話中略帶倦意地說：「今日生咗啦！多謝大家關心，生咗個八磅幾重嘅囝囝，我開刀生完個B，𠵱家仲幾攰，但個房入面有好多人，因為媽咪一家嚟晒睇我，其他朋友我仲未有時間通知。」
停工湊仔
「交畀人我唔放心」
問靚靚成為母親後有否感到壓力重大，她笑說：「我醒番時見到個仔喊，然後姑娘抱個仔畀我抱時，我見到佢對住我笑，心情真係好興奮，但同樣我明白養育一個小朋友真係唔簡單，所以我係感受到呢份壓力，好似頭先我同Chilam抱BB時，完全係雞手鴨腳，仲要媽咪教我哋點抱BB。」
靚靚計劃未來數月會暫時停工，全心全意照顧囝囝，她說：「我諗頭一年最好可以自己照顧個仔，因為交畀其他人照顧，我就唔係咁放心。」問靚靚會否追多個女時，她哈哈笑說：「順其自然啦！呢個先啱啱出世，咁快講生第二個，不過我知Chilam係想生個女，佢話女比較錫爹哋，但有時唔係話你想生女就生到女。」
爹哋開心
「再多個女最完美」
至於初為人父的Chilam昨日原本十分高興，但後來得知弄璋之喜已經通天，則感到有些掃興。Chilam說：「除咗好少數嘅人知道外，我真係唔知係乜嘢人講出嚟，原本生咗個仔，我都好開心，係通咗天就有啲掃興，不過我入產房陪住靚靚生BB時，見住個仔出世，嗰種興奮心情係好難形容，個BB已經改咗名，但唔會向外公布住，唔知係咪因為個BB太細，我都未睇到個仔似我多啲定係似媽咪多啲。」
問Chilam有否打算追多一個女時，他說：「女係幾嗲，不過仔都可以同我一齊做運動，所以仔女我一樣咁開心，咁𠵱家有個仔，如果再多個女，梗係最完美啦！不過我就要好努力搵奶粉錢。」
採訪：陳月媚
