梁伯韜昨日公布收購電盈的財團資料後，本報記者以電話訪問他，聽其瞓身落電盈的心聲。
記：記者 梁：梁伯韜
記：究竟你拎咗幾多錢出嚟?個人資金、銀行融資同李嘉誠的借貸各佔幾多?
梁：點講得你知，呢啲係私隱....總之我幾乎成副身家放晒落去...比例唔講得。
記：件事（籌組財團）終於搞掂咗，𠵱家心情點樣?
梁：哈哈，輕鬆晒囉!
記：點解同Telefonica設定10個月作價有下調機制條款?係咪擔心電盈股價下跌?
梁：唔講啦，規定毋須要披露，總之唔係擔心股價下跌至咁做。
記：新財團內可以各派幾多人入電盈董事局?
梁：𠵱家未落實，等交易完成後我先講。
記：市場認為電盈管理得麻麻哋，你會點執番好佢?
梁：等交易完成晒先啦，總之我拎咗副身家出嚟，一定會畀心機做。
記：咁你早排搞緊個VentureCap（創業基金）點呢?唔做定係放慢，或者一齊做?
梁：個VC？唔做啦，起碼𠵱家會放慢唔做住。