藍籌選美，「大熱」中石化（386）與中國銀行（3988），雙雙成為恒指成份股。其中中行較令一啲網友意外。
在《香港討論區》上，etrade4fun留言：「點解無啦啦中行都入埋恒指？早嗰輪放鬼咗，真係激死人!!!」happygracechu就試圖搵個原因出嚟，佢留言話：「阿仔入咗，無理由阿媽唔入喎！」聽落好似幾有道理。
上周收爐入貨 有眼光
有人太早「沽貨」，亦有人入齊貨等收成。好似網友kit1708就拿揑得比較準，佢話：「周五收市前一分鐘買咗，用3.41元買入5萬……真係好彩！」wawawadot就更加厲害，佢話：「係周四以3.37元，入咗10萬股！」真好眼光！
已持有或成功「趕尾班車」嘅網友固然開心，趕唔切入貨嘅網友又點樣呢？大咪話：「入咗又點吖……建行（939）夠入咗啦……咪又係咁……」小至至仲黑心話：「掉頭倒跌……跟手被踢出恒指！」真係有啲酸葡萄，若然有關揣測成真，唔知呢兩位網友會否「入貨」呢？