被英女皇授勳，本來係值得高興嘅事，不過，對地鐵公司行政總裁周松崗嚟講，竟然變成一次「驚險過程」，佢接受香港總商會嘅《工商月刊》訪問時就憶起呢一段。
話說佢喺02年被英女皇授勳封爵，當日正式進入白金漢宮大禮堂之前，佢同其他等候授勳嘅人士進入翠廳（GreenRoom），有人先將授勳嘅程序講一次：會有一張附有手柄嘅小櫈，畀你用嚟單膝跪下，然後英女皇會用劍輕觸肩膊。周松崗被叮囑儀式進行時唔好垂低頭，應該仰望女皇。但到佢走上前受勳時，好自然咁垂低頭，到儀式中段先記起指示，諗住抬番起頭之際，女皇嘅劍啱啱放落嚟，佢當堂嚇一跳，笑言好彩冇成為第一個喺獲授勳時，被女皇斬首嘅爵士。
講到𠵱家香港面對嘅問題，周總裁認為有三大，就係空氣質素要改善、點樣吸引全國嘅人才來港，以及香港嘅施政效率已受到民主嘅多元性所帶來負面影響喎。