港股上個禮拜五低收，成交500幾億元，今朝早有機會低開，但係低開嘅幅度唔會大，除咗港股個大勢仲好好之外，上日美股靠穩，亦係原因。之不過呢兩日啲大藍籌有回氣整固嘅迹象，而啲地產股就好似仲未跌完，估計個市會傾向橫行。
個市要整固冇法阻止，但係升咗咁多整固吓，其實係好事，啲專家成日都係咁講，並非冇道理，不過，咁唔代表個市冇得炒，睇吓，500幾億元成交喎！裏面有幾多係窩輪嘅成交？嘩，係130幾億元，你話啲炒家幾陶醉！上個禮拜啲國內銀行股成為股市之星，粒粒都燦爛無比，揸咗啲C輪，好似豬籠入水咁，今個禮拜會點，相信仲係銀行股嘅世界，炒股要吼強勢股，炒輪更係咁，寧買當頭起，炒輪係取槓桿之長，只爭朝夕，強勢股升得太多，可以縮減注碼，當頭起嘅股份，則可以較為進取。
工行C輪9909：工行（1398）上市，全球矚目，集資額破紀錄，僧多粥少，股票唔夠分，大戶同散戶喺呢啲情況嘅睇法同做法會好唔同，或者應該話係多數相反，基金買工行呢類股票，一般會長揸，講緊嘅「長揸」係好長嗰隻，股票分唔夠，就要喺個市慢慢買，當散戶嘅貨落喺呢啲強者之手，個價就會抽高，要增持嘅基金數目愈多，升勢就會愈急，過去兩日工行嘅成交顯著增多，股價就升咗上嚟，睇個勢好快會破4元，再試4.35元。隻C輪9909上日報收53仙，槓桿率6.9倍（有效6.6倍），對沖值0.95，引伸波幅應會掉頭上升，加快輪價上升速度，正股升上4元及4.35元，9909應該高過80仙同埋1.15元，正股跌穿3.50元止蝕。
俊 樺