澳洲天后KylieMinogue舊年5月宣布患乳癌，即時取消澳洲及亞洲嘅巡迴演出。經過年半嘅休息，Kylie噚日喺悉尼再度開騷，喺父母親朋同埋10,000名fans面前再現舞台風姿。
噚日Kylie一上台就話：「我好開心可以再重踏舞台，我等咗呢刻好耐。」因為Kylie身體仍未完全康復，所以舞蹈表演明顯比上次巡迴少，全靠身後大班裸男同埋作性感打扮嘅舞蹈員代勞，不過Kylie唱歌時依然中氣十足。其實今次Kylie再度開騷，舞台服全部經過重新設計，雖然睇上去好大堆頭，但全部都好輕身。喺每一場演唱會中，Kylie都有私人醫生相陪左右，一切以健康為大前提。佢將會喺澳洲開多19場演唱會，下年會去英國開騷。