「王子」托廸前晚梅開二度助羅馬擊敗AC米蘭，賽後接受訪問時就堅持暫時唔踢國家隊。自從世界盃後，托廸一直以傷勢好番冇耐、狀態未得為由拒絕為國效力，但睇佢家吓狀態咁弗，有乜理由仲唔肯出番一分力先？如果個個大牌球星都學佢咁，意大利國家隊咪聽玩完？
扮大牌以為冇佢唔得
求大俠覺得呢個托廸咁做都算冇品，如果你要專心為羅馬賣命嘅，世界盃攞冠軍後就唔好話90%會退出國家隊，之後教練鄧納東尼稍作挽留，又扮大牌話要07年先復出，以為國家隊真係冇你唔得咩？
仲有，托廸作為意甲數一數二本土球星，唔該咪做壞個頭喇！正所謂上樑不正下樑歪，尤其係意大利攞到世界盃冠軍後，好多球員打國際賽都冇厘神氣，咁樣落去歐國盃出線資格都危危乎！
羅馬隊友彭路基賽後亦話唔會復出國家隊，佢講：「要懂得咩時候退出，我都34歲喇！代表國家隊只剩下美好回憶。」
彭路基嘅理由就充份得多，加埋佢曾被納比拒諸門外，意興闌珊就值得體諒。
「江山代有人才出，最弊係有人冇heart又唔引退，阻住新人發揮；如果托廸覺得羅馬緊要啲，就應該正式宣布退出國家隊，𠵱家隨時做壞規矩，影響到軍心咪仲衰！」