搞U-RIGHT呢個大眾化品牌近廿年，佑威見中國經濟爆得咁勁，忍唔住整檔「內地I.T」SEVENDAYS，吼實超叠水嘅80年代獨生兒，上個禮拜六喺上海搞開幕禮，搵咗香港嘅Twins北上剪綵，夠晒同聲同氣。撐場嘅仲有成班財經名嘴，好似「陸叔」陳永陸、鄧聲興、連敬涵、藺常念等，人氣爆晒燈。
但點都唔夠「跟團」嘅房屋及規劃地政局局長孫明揚兩公婆咁畀面，遠道而嚟捧場，唔知係咪同U-RIGHT租咗領匯商場22間舖有關呢！不過孫公同華華講，老婆鍾小芬同佑威老闆娘嚴玉琳不嬲好friend，老友上海大展拳腳梗要賀吓，咁啱自己放假，咪做一次跟得老公。
成班行家難得喺上海見到孫公，當然唔放過問吓佢，點解牛頭角市區靚地要起公屋咁嘥料。點知佢話，塊地都冇發展商吼，唔起公屋起乜喎。