自從SCEH宣布PS3行貨緊貼美日，同期在11月於香港推出之後，有關PS3的消息完全攻陷各大傳媒，成功地為PS3挽回不少聲勢。正當全球玩家期待着11月11日的正式推出（日版）之際，本港水貨商人卻搶先於11月9日取得小量貨源發售，一如以往地以高價炒賣，60GBHDD版本更炒至$8,500！
文：魚生
新宿池袋千人輪候
先睇日本首賣情況，如秋葉原電器街、涉谷等地區，據講早於9號夜晚已開始有買家「靜坐」守候，直至11號首賣當日，新宿、池袋嘅人龍更長達100米，足足有千人輪候！最慘嘅係，並唔係肯排隊就一定有份，所有店舖都採取配額制，好似涉谷ShibuyaTsutaya，佢就喺首賣日清晨4時30分開始派「飛仔」，但由於貨源僅300部左右，未到6點就派晒！至於秋葉原排隊嘅買家仲慘，人數勁多之餘仲落住濛濛細雨，買唔到嘅話真係幾灰。
港機迷抱觀望態度
據水貨商透露，由於PS3全球缺貨，故首批來貨只有約20部，而且也未確定下次返貨日期，在「手快有，手慢無」的情況下，PS320GB版被炒至$6,800，60GB為$8,500。其實相比起PS2過萬炒價的輝煌成績，今次的炒風並不算嚴重，甚至令人有點跌眼鏡，主要原因是SCEH已公布行貨的詳情，確定推出時間及三千多元定價，使玩家們的注意力集中在行貨之上，只要多等數星期便有行貨來臨，直接地令水貨的吸引力大減。該水貨商表示，購買PS3的顧客只有少數是玩家，其他的都是開發硬件周邊的廠商為多，而圍觀的人潮亦比過往的少，這些都反映出香港玩家的意欲。
玩家：等買行貨
以前PS2等到頸長都未有行貨消息，今次快之餘更差不多同步發售，值得一讚。始終炒價與正價的價錢相差一大截，要玩也不急於一時。其次是首批發售遊戲只有4款，來來去去都是見慣見熟，倒不如等埋行貨，或等埋11月尾任天堂Wii推出後，再決定幾時入貨。
