李亞鵬同王菲生嘅小女兒李嫣因為天生兔唇，早前佢兩夫妻專程帶個女到美國醫治，聽講手術相當成功，李亞鵬仲因此成立兔唇兒童基金會。呢個基金會喺下個禮拜二（21號）正式成立，除咗佢兩公婆會捐一筆錢打底外，李亞鵬嘅契爺張紀中亦已經答應捐一筆錢支持呢個基金。
寓意幸福微笑
阿菲連基金名都選好，佢話會以「嫣然天使」命名，因為嫣然帶有微笑愉悅嘅意思，所以阿菲兩公婆希望有兔唇嘅小朋友可以透過呢個基金得到幸福嘅微笑。
李亞鵬嘅經理人馬葭同內地記者講，會透過呢個基金搵外國一流嘅醫療人員去幫內地兔唇小孩做手術。張紀中同記者講，話李亞鵬夫婦氣色唔錯，孩子都康復得特別好，唔係細心睇，根本睇唔出曾經有兔唇。