各位看官，雖然坊間各種富豪榜被指有鼓吹愛富嫌窮嘅不良副作用，不過，華華對呢啲富豪榜有另一個睇法，覺得用佢嚟捉賊都幾好使，而且可以畀呢啲富豪一種無形壓力，唔好亂嚟，因為一上榜就有幾億對眼昅實，好易成為稅局、公安、國安嘅調查對象，32歲嘅前明倫集團（香港）（346）主席兼「最後生深圳富豪」周益明，就係一個例子，分分鐘成為大陸首個以「合同詐騙罪」，坐10年甚至無期徒刑嘅所謂富豪！
周益明02年8月（當年28歲）嚟香港，用咗5666萬港銀，買咗346隻殼68%股權，之後佢用11萬人仔（下同）搵咗深圳一間會計師行，幫佢間只得7000萬嘅私人公司明倫集團做咗盤假數，做到呢間公司02年總資產達27億，淨資產12億，然後佢用呢盤假數，響03年同大陸銀行借咗3.8億銀，買咗上海A股明星電力28.14%股權。
突然發達必有因
從此，呢位哥哥仔就將注意力集中響明星電力，04年9月將346檔嘢用7500萬港銀，賣畀許智明，當明星電力係提款機，撻咗5.5億，跟住入埋福布斯富豪榜，04年排155位，05年雖然跌落207位，身家仲有9.8億。
咁後生又冇咩成功生意紀錄，突然咁發，仲唔俾人用放大鏡睇真啲，一睇就出事，終於響舊年11月中，俾四川遂寧市公安拉咗，該市中級法院今年11月3號完成審訊，判決稍後公布，睇怕佢出得番嚟，都已變咗中年咯。
[email protected]