同事介紹日本過江猛將MosBurger，試過大讚好味，於是開張後第二日我就老遠坐車入觀塘準備試食。去到下午3點半，點知2點半至4點半停售，話要保持質素咁話。仲有成粒鐘，我決定唔等！繼續坐喺FoodCourt食嘢，估唔到去到4點鐘已經有人開始排隊，數一數，仲未到4點半開爐已經有70人排隊，實在太瘋狂！
上星期四，諗住趁唔係假日無咁多人再去試，夜晚8點半人龍依然有70人，真誇張！問番餐廳經理，原來開舖以來咁多日，未試過無人龍排隊，生意額比預期中多咗2.5至3倍，日賣1,300至1,500個Burger，唔怪之得我第一次去到時見到已有一半嘅Burger售罄啦！最近有人見到朗豪坊一個圍板的舖位寫上MosBurger字眼，問埋經理係咪會開新分店，佢卻一口否認，官腔地回應：「一切都未決定。」不過就算旺角開新分店，人龍只會排得更長，想食都係有排等！