香港廸士尼樂園舊年9月12日開幕，到𠵱家已經一歲多。喺呢段日子，美國華特廸士尼嘅業務好到不得了，截至今年9月底止嘅對上一個財政年度，純利同生意額都打破紀錄，期內股價亦大漲28%，莫非香港廸士尼真係咁好腳頭？
廸士尼喺新聞稿中，提到去年度主題公園和度假酒店業務多賺三成，香港廸士尼亦有功勞。可惜廸士尼今年未有特別提到海外主題公園嘅實際進賬，所以冇法子幫香港廸士尼計算一下成績。
記得喺04至05年度嘅年報中，廸士尼特意將海外主題公園嘅營業額分列出來。廸士尼上年度業績咁好，又話香港廸士尼幫到手，反而呢一欄目今年失蹤咗。難怪香港廸士尼嘅管理層有樣學樣，一直以商業資料敏感為理由，唔肯公開營運資料。