上星期去參觀新加坡車展嘅行程真係緊湊得驚人，先有出發當日飛機Delay，搞到我哋全部人遲咗個幾鐘頭先到埗，跟住又要趕去Subaru代理喺當地嘅大本營SubaruHub，用短短一個鐘嘅時間，4個行家一齊測試仲未到港嘅新款LegacyOutback3.0，跟住再趕返去酒店CheckIn兼同當地代理嘅代表食晚飯，真係趕到無人有。
翌日大清早就要爬起身，趕往車展會場採訪，場內唔只靚車多，就連Showgirl都好多，睇到我同班行家都唔知影車定係影Showgirl好。做咗咁耐，都係時候暫時離開會場休息一下，但呢一刻卻搞到我有好似返咗香港嘅感覺，點解？因為一部喺我眼前出現嘅的士，個Look好似成部香港嘅市區的士咁樣，睇錯真係一啲都唔出奇，隔一陣出現嘅另一部，仲用埋上黃下黑嘅車身顏色塗裝，同澳門的士根本無分別，抵死到呢……其實新加坡的士係有超過4種顏色，佢哋所代表嘅係幾間唔同嘅的士公司，而所用嘅主力車款亦都同香港一樣，都係ToyotaCrownComfort同埋NissanCedric，唔同嘅只係佢哋係4座位車兼係柴油車，但呢啲的士完全係無黑煙，就連個車身同車廂都好亁淨，香港嘅的士應該學習一下。
記者、攝影：鄭達基