上周六談揀股技巧，仲有一個方法，係睇新聞炒股。較早前冰島財團高價大手買入整幢澳門豪宅，有炒股觸覺的話，除咗追信德（242）之外，第一時間會諗澳門地產股保利達（208）同埋九建（034）。
油王高溢價買入四季酒店，自然要吼同屬世界級酒店集團的大酒店（045）同埋香格里拉（069），呢單新聞出咗街，大酒店升咗4日都未升完。
近日納指表現強過道指，科技股有機會輪到炒上。香港上市科技股之中，上星期五有隻品質國際（243）異動，大升14%。呢間公司上月底公布全年業績蝕少咗好多，由上一年2.67億銀減少至2500萬銀，公布後股價短短兩個交易日升咗近0.2元，經一輪整固後復現升勢。旗下佔42%嘅樂依文已將賬面值減至零，未來虧損不再入賬，反而呢間Nasdaq掛牌，應佔市值逾4.2億銀嘅公司一旦賣盤成功，品質可望套現每股逾1.7元。
順帶一提，品質有隻公司輪153，明年10月中到期，行使價高到1.82元，溢價成140巴仙，呢批兩年前5送1嘅紅利認股證，發行時正股仲喺1.7元，兩年內股價竟可勁跌逾6成，假如品質股東當初收到股證冇沽到，仲有一年睇吓有無機會上番去行使價。
歐陽風