政府房屋政策，時時俾人鬧到狗血淋頭，好似前幾日，政府話，可能會將牛頭角下邨地皮起六座公屋，消息一出，即刻惹嚟成30個網民，喺香港討論區發表意見，明顯反對居多。
「牛頭角變天水圍」
herry2046好不滿，政府冇考慮過觀塘區嘅前景：「𠵱家起六座公屋，政府真係貼錢養窮人，到時這區人口老化，新移民又多，成個天水圍咁，你住…我成日行過，都會望到塊地，心諗，呢度起樓就好，到時換樓換呢度，就算到時冇錢換，等呢度啲樓價升返啲都好！唉…！」
另一位網友Anti_block，就大罵政府成日分派公屋畀新移民，係浪費社會資源。佢話，以前落嚟香港嘅國內人，同𠵱家好唔同，佢哋係為避難，或尋求新生活而努力，𠵱家嗰班，就以為香港唔使做，可以歎世界，令佢覺得好唔公平：「好彩嘅，獲派公屋，住屋環境比好多私人單位更好…其實公屋只以基本為原則，市區地，盡量唔好建太多公屋，咁先鼓勵到啲人去努力工作」
code5600就覺得，其他網友成日將公屋居民標籤做新移民同懶人係唔多啱：「你哋咩心態？住公屋，唔係全部都係新移民！香港打工仔有好多都冇錢買樓，住公屋好正常！難道公屋唔可以喺靚地起？你哋有錢買樓嘅，當然只係顧住自己喇！」
唉，呢啲問題，真係口同鼻拗，順得哥情又失嫂意，睇怕，政府今次都係難逃市民一鬧啦。