港股進入大時代，恒指由6月中開始上升近3800點，升到19000水平，係時候要調整一下，落幾多？幾百點又似，甚至落番1000點，即係50日線水平（17842，上升中），都冇壞，亦都係畀淡友玩「15/16」，有轉軚嘅機會。
大牛市係由大行同基金發動，基金股自必然係佢哋操上嘅主力對象，基金股有大細，大嘅已經升到你唔信，相信細嘅亦會好快接力而上。基金股成份最重嘅係大慶石化（362），上周五已有異動，趁佢未大郁之前，上車。
大慶有21億股，市值8.5億元，「晒士」唔算大，大股東係亨泰（197），但持股只2.73億股（佔13.03%），基金呢，就揸得好重，包括UBSAG、PopeAssetMGT、DeutscheBankAG、同INGGroepN.V.等合共7個，要申報嘅基金（持股超過5%）就揸咗57.61%，至於唔使申報嘅，相信亦有唔少，即係大慶在街外流通嘅貨源極之有限，只要基金一郁手，升硬。
過去半年，大慶做過兩單大交易，一單係5月時以2.8億元收購生產葡萄糖及澱粉嘅企業60%權益，另一單就係今個月以2億元收購黑龍江牡丹江佳日熱電全部權益，每年可生產160萬噸蒸氣及2億千瓦時電力。股價呢？半年內冇點大郁過，大部份時間都係在0.40元水平反覆，公司為咗未來發展，開展咁大拳腳，股價作動亦到時候了。
基金成份超重
仲有，半年來有兩次配股，一次係4月以每股0.48元配售2.49億股，一次係5月以0.52元配售8354萬股，貨源大部份落在基金手中，佢哋遲早要做工夫，家吓0.415元，抵買。
上周五大慶成交804萬股，唔算多，但已比上周四多出3.3倍，股價亦已開始拋離10日、20日同50日線，一衝破250日線0.44元，大升浪即可開展，初步目標係0.50元。
郭兆誠