半趟鋼閘不能全開工程公司卸責

半趟鋼閘不能全開工程公司卸責

有讀者向鋁鋼工程公司購買一道半趟鋼閘,安裝後因一時疏忽未有即時驗收,至一年後須更換雪櫃,才發現鋼閘只能向屋內拉入、不能向外推出,因門框頂住而無法完全開啓,以致壞雪櫃滯放家中,新雪櫃又不能搬入,甚是頭痛。有關公司拒絕負責,反指事主知道該閘情況仍要購買。事主怒氣難消,遂向本報投訴。

大型家電無法進出

徐女士去年向大埔懷仁街的國華鋁鋼工程公司訂造一道半趟鋼閘,費用為2,300元。安裝妥後,師傅沒即時推開閘門試驗,她信任對方故沒即時驗收。使用該鋼閘近一年,最近她家中需更換雪櫃,收買電器的師傅上門搬雪櫃時,發現鋼閘只能向屋內拉入,因受門框所阻,故無法推開整道閘門,雪櫃無法進出。
徐女士致電該鋁鋼公司,女負責人着她再付款造新閘,或幫她拆走該鋼閘,待搬出雪櫃後再裝回。徐小姐氣憤地說,「咁下次要搬大型電器或傢俬,豈不是又要再拆再裝,根本唔成道理。𠵱家最慘係冇雪櫃用,新雪櫃又搬唔到入嚟,真係好激氣。」她直斥該公司不負責任。
記者致電國華鋁鋼工程公司,負責人陳小姐推說責任不在該公司:「呢道閘之前有客訂造,放喺舖度,佢(徐小姐)話急用,我哋有現成貨喺度,同佢講過有咁樣情況,佢了解咗都話要裝,唔關我哋事。𠵱家我可以幫佢拆走,等佢搬完電器再裝番。」
徐小姐獲悉有關公司的回應後更激動,「我買道閘都係想開到門,冇可能我知道推唔開都重要裝,根本冇同我講過有咁嘅問題。」
檔案編號:1004004

話你知:裝閘後即試開關

記者曾到旺角一帶專做鋼閘工程的公司查詢,有業內人士透露,除非是客人特別訂造成拉入狀,否則半趟鋼閘通常都是向屋外推出。一般情況下,師傅會先上門度尺寸,以配合大門門框的高度和闊度,所以甚少會造到拉入時頂住門框的情況。他提醒消費者如要裝閘,除要求師傅上門度尺寸外,更要說明鐵閘門是推出或拉入,且在安裝後,即時要求師傅試開關,便萬無一失。