父母成日都話，要由細開始養成儲蓄嘅習慣，啲錢除咗放入銀行收息之外，最好就係識得投資「錢搵錢」。不過，投資其實係高深學問，就算縱橫股壇多年，都可能損手，何況初哥呢？
係《MSN》討論區中，美國19歲學生AgInvestor，向網友討教，想用8500美元（約6.6萬港元）投資，列咗10隻想買入嘅股票，包括eBay、雅虎、微軟、中石油（857）及百事等，請網友畀啲意見，仲話，就算蝕咗都冇所謂，最多當上課囉﹗
6萬股票組合 冇肉食
MillertheLarge回應話，個投資組合，面對嘅風險都好類似，應該搵啲風險相對較低嘅，而且，8500蚊美金其實唔算多，買晒咁多隻嘅話，每隻持股量就會好少，除非大升，如果唔係，扣埋手續費之類，根本都冇乜肉食，不如考慮買收費較低嘅指數或交易所買賣基金（ETF）仲好，等儲定多啲彈藥，先再喺股壇搏殺！rsinj就覺得，買債券好過買股票，回報雖然較低，勝在夠穩陣。
網友Granny45同rovo就話，投資股票有好多玩法，年輕人，趁嫩投資當然有着數，起碼蝕咗都可以當交學費、上咗一堂囉！但最好都係先搞清楚買股票嘅動機，到底係想買完放埋一邊，抑或想短線圖利，定係即日鮮？
gonegolfing就覺得，與其蝕晒啲錢當交學費，不如認真報讀投資課程，好過乜都唔識俾人點，連衰咗都唔知發生乜事﹗