上個禮拜，孫柏文同大家講過「泡沫」同SouthSeaCompany嘅關係。睇番當年，SouthSea股價見頂嘅一刻，其實係可以從睇投機熱錢湧入湧出來判定。其實自古至今，好多時要知道一個泡沫見頂嘅一刻，真係從睇投機熱錢走勢就可以。例如，17世紀嘅鬱金香狂熱tulipmania，見頂嘅一刻都係因為當時嘅荷蘭政府頒布話鬱金香花唔係一樣「投資項目」，而係一樣「消費品」，所以命令所有銀行要立刻停止借錢畀人買鬱金香。「錢源」一斷，泡沫亦爆煲。
又或者睇番千禧年嘅花旗國科技股。當年，因花旗國中央銀行聯儲局，擔心電腦會有千年蟲現象出現，繼而影響經濟表現，所以將大量現金推入銀行體系裏面。最重要嘅係。聯儲局不斷推現金入銀行體系嘅動作，一直做到3月先至停，之後就開始抽錢走，而納斯達克指數亦係喺3月5000點見頂。如果大家再細心留意，其實當年由1月至3月，納指由4000點升至5000點，新進入市嘅熱錢量，就啱啱相等於當時同一時間聯儲局推入銀行體系現金嘅數量一樣。
「難貨」股市作警號
今時今日，大家如果要估個股市幾時見頂，就不如留意啲熱錢同資金究竟有冇流走。首先，最緊要睇吓世界各國啲中央銀行有冇抽錢走，特別係花旗國同日本嘅中央銀行。因為，聯儲局由3、4月開始到現在都冇增加熱錢數量，表現穩定，所以最緊要睇日本點做。如果全球投機者覺得日本會抽錢走，大家就會見到好似今年4、5月日圓喺短時間之內有大升幅。
不過，就算投機者覺得日本會抽錢走，佢哋都會順次序去賣嘢，要賣晒手頭上啲「難貨」，跟住睇定先，如果有需要至賣「好嘢」。好似我哋特區股市5月下跌，發生時間喺日圓升浪之後（圖二），代表特區股市係國際投機者「好唔情願」之下賣股。不過，冰島股市喺2月已經開始下跌（圖一）。咁冰島股市現在11月已經升番好多，今次估特區股市幾時見頂絕對可以用番好似冰島股市呢類「難貨」股市去作警號。