拿起雙筷夾一片腍薄的牛肉，送到沸騰的鍋邊涮一下擺入口，好味道！再飲啖湯先，又係豬骨湯！悶唔悶啲呀！次次都食一樣嘅湯底同食物，可唔可以搞啲新意思呢？最近俾我搵到新奇嘅湯底，其中芝士龍蝦湯底同辣酒煮花螺湯底夠濃味，再淥吓法國鵝肝同新鮮八爪魚，今個冬天打邊爐有新體驗啦！
記者：黃若茵
攝影：楊錦文、譚盈傑
芝士龍蝦火鍋 約$168
冇想像湯底會咁杰，其實基本湯底是豬骨湯，加芝士及牛油，再特別加入香料中和濃味及油膩感。每鍋龍蝦份量約十両，唔夠喉可再加。除了龍蝦肉外，可多吃麵類或烏冬類，麵條間夾着香濃芝士汁，口感豐富，收費按龍蝦時價而不同。
肚包雞鍋 日限十煲
打邊爐絕對唔係淥熟塊肉咁簡單，有30多年廚房經驗嘅周師傅話：「除咗材料要新鮮，湯底都好重要，一定要飲得落肚，𠵱家唔係每間火鍋店都做到，因為熬一個靚嘅湯底，一定要長時間。好似我哋嘅魚湯咁奶白色，真係熬出嚟㗎！試過有啲對牛奶敏感嘅客人同我講，飲出面嘅火鍋湯底飲到嘔，因為加咗牛奶扮魚湯。」開舖咁耐，客人從未投訴湯底出事，皆因周師傅夠認真，就好似一個「肚包雞鍋」，因為熬湯時間長，所以每日只限十鍋。今年推出3款新湯底均甚有新意，原來老闆本屬嘴刁之人，要求師傅創作特色湯底，每鍋均足料又香濃，真係飲湯都半飽啦！
牛全食$98
一碟約有十款牛隻不同部位的肉食，其中以牛湘蓮最矜貴，一隻牛只有三両牛湘蓮。另有牛爽肉，屬胸骨關節外的軟骨，比牛𦟌還要爽口。
（前）招牌餃$28
（後）韭菜餃$33
全是人手包自家製餃子，招牌餃以皮薄見稱，包住豬肉、冬菇、笋絲等餡料，肉香惹味。韭菜餃亦好足料，包到脹卜卜，咬落啖啖韭菜絲。
肚包雞鍋$98（須預訂）
將半隻雞、胡椒、藥材如淮山、圓肉、紅棗、黨參等，釀入豬肚中熬上4小時，胡椒有助暖胃，各種藥材亦滋補禦寒。食時切開豬肚，即聞到陣陣藥材及雞肉鮮甜味，冬天吃必定好Warm。
辣酒煮花螺鍋$68
湯一滾起便傳來撲鼻黑椒味，原來周師傅用了黑椒、指天椒、白椒及香葉等，加花雕及玫瑰露，湯味甚濃。一鍋約有十両花螺，螺肉愈煲愈腍亦更入味。另外牛肉更是配此鍋首選，辣酒濃味有助牛肉味發揮。
食客有Say
搵食攻略
利得火鍋（23836579）
地址：九龍城南角道56號
營業時間：5:00pm-3:00am
交通：九龍塘地鐵站乘的士約$20
全店座位：50個 人均消費：$100
最好賣：牛脊，日賣過百份
淥鵝肝八爪魚唔油膩
「公主順濠海鮮火鍋酒家」做咗13年火鍋，原店位於太子，最近租約期滿，搬遷至土瓜灣，雖人潮不及太子，但老闆成哥無有怕：「以前嘅熟客唔少都係揸車入嚟食，所以影響唔大，揸車到土瓜灣一樣好方便。」火鍋做了十多年，客人唔悶自己都怕悶，「香港人最怕悶，做打邊爐一樣，一定要有新意，就算人哋有同一樣用料，都要有自己嘅特色，有自己嘅HomeSpecial！」要數成哥最得意之作，必是一客鵝肝。聽見用鵝肝作火鍋料，第一印象就是「膩」，所以無人敢試，偏偏成哥本身愛吃鵝肝，煎焗食法試到悶，一試用作火鍋，效果出奇好，因為油份都走到湯中，鵝肝入口一點不油膩。食過鵝肝，再來一口鮮八爪魚，好滿足！
鵝肝$118
鵝肝由法國入口，放到滾湯中淥分半鐘左右，可見鵝肝中金黃色的油份不斷滲到湯裏。喜歡原汁原味的話就不用蘸任何醬汁，怕膩則可蘸自家製的鵝肝醬。
木棉魚湯$68
每朝先用梳羅、牛鰍等魚類熬湯，熬至奶白色。客人Order後再加入原條大眼雞、木瓜、薯仔、番茄等上枱，湯味鮮甜，且只加湯不加水，確保湯夠濃味。
三色牛$78
分別有邊牛、牛𦟌及牛頸脊。邊牛屬坑腩部份的肋骨條，牛肉味最重。牛𦟌則是雪花牛，咬落爽到脆卜卜。牛頸脊就食其腍口質感。
搵食攻略
公主順濠海鮮火鍋酒家（23811818）
地址：土瓜灣偉恒昌美景街118號地下
營業時間：5:30am-2:00am
交通：可達九龍城碼頭小巴，如7、28M，再步行5至10分鐘
全店座位：180個 人均消費：$150-$200
有着數：晚市9:30前惠顧自選火鍋，即送原條活紅魚刺身，5位以上送2條。
最好賣：三色牛，日賣過百份