馮國經、國綸兄弟管理嘅「利豐」，可能係世界上最大嘅供應鏈公司（幾十年前嘅古老叫法係洋行，後稱貿易行，現稱貿易公司，最適合潮流嘅叫法係供應鏈公司，當然內裏含義有啲唔同。）馮氏兄弟可能係哈佛MBA之中，對香港產生最有實際影響力之人，好幾年前HarvardBusinessReview就已經訪問馮國經講利豐供應鏈之成功個案。
利豐捐一千三百萬元畀中大成立「利豐供應鏈管理及物流研究所」，認真大手筆。有人話馮國經係港大校董會主席，利豐點解唔捐呢千三萬畀港大呀？呢啲先生女士或有所不知，如果講私人關係，馮國綸係中大校董，馮國綸之外父周文軒係中大校董兼新亞書院校董會主席，馮國經喺三十多年前係中大MBA課程教授，直至馮博士接替楊鐵樑爵士成為港大校董會主席之前，佢與中大嘅關係仲深遠過與港大。馮氏兄弟精明過人，心思縝密，素來對事不對人，捐錢唔係單講私人關係嘅。
空運N本來搞開空運、快遞，視馮博士為偶像。𠵱家追上潮流講供應鏈，亦叫自己間公司為物流公司，業務唔係運貨，而係logisticssolutionprovider（物流方案提供者，可能俾陶傑鬧為去中國化嘅中文名詞），認真夠in。空運N以前在一間XYGodown（即XY貨倉）服務，老闆之子自美國返來，主管業務，認為Godown唔好聽，拆開就係godown，你估好好聽乎！於是改名為XYWarehouses。三年前，緊跟潮流，再改為XYLogistics（物流公司），唔知到咗明年，會唔改為XYLogisticsSolutions呢？
Godown呢個字，自細就識，以為好普通，誰知不然。《朗文當代高級辭典》與《朗文當代大辭典》都搵唔到呢個字，有啲奇怪，於是上網追查此字源流，原來出於馬來亞話godong，在殖民地時期，印度及馬來亞海岸碼頭附近之存貨倉就叫做godown，故此字在英美似乎不大流行！空運N以馮氏兄弟係佢學習目標，話會努力學習利豐，將自己由一間godown嘅打工仔向上提升，一於goup成為供應鏈專家喎。