近排好多中資金融股炒到40、50倍PE，好似國壽（2628）、平保（2318），升極唔見盡頭，散戶愈高愈搶；交行（3328）、招行（3968）亦步步高升，冇令捧場客失望。
惟獨中行（3988）同建行（939）呢對難兄難弟，傷盡好多fans嘅心，網上日日見有人呻搭錯車，仲謔稱之為垃圾股。中行上周五收市後爆出晉身恒指成份股，有人自言守得雲開，但有人非常唔好彩，臨門一腳跌落車。隻股上星期五收3.41元，升2仙。
喺「香港討論區」入面，上星期五甫開市，「唔該凍奶茶」即刻出post：「好彩剛好放了垃圾股3988……升來升去，幾仙幾仙。」
建行等4蚊先走
其他網友PC999111、ko11、HSW、eric_chan亦申報已經落咗車。
不過，唔少網友認為，佢哋做錯決定，Artemis@ET話，老散散水，莫非大升將至？
xyz328亦反問：「成交大增先走貨……好等錢使咩？」
Peintre有啲幸災樂禍：「好消息：又多一個人落車，離爆升不遠矣！」
但亦有死守派，lshjhk話：「我939落錯車，現在我一定唔走，等$4蚊先。」
cwaiwing都係咁話：「死等~~~我死都唔信你一世都唔升。」
中行借勢衝$3.48
中行6月1日上市，招股價2.95元，上市以嚟，除咗第一個月有少少睇頭外，之後一路喺3.32至3.48元之間橫行。截至上星期五，只係高過招股價16%，跑輸同業幾十條街，難怪散戶怨氣咁重。
今次染藍，如果可以借勢升穿3.48元橫行區阻力，應該可以挑戰上市後高位3.675元，呢個位一日唔升穿，都唔好有太大憧憬。
大家不妨睇吓佢個仔中銀香港（2388），2002至2003年期間，喺7.5至8.7元之間橫行咗足足一年先爆上，結果唔夠5個月，升到15.90元高位。揸住中行嘅，如果驚歷史重演，唔想浪費機會成本，不妨等有勢至追入，但如果有耐性，可以同佢鬥長命。
余文