中銀香港近兩年都有贊助本港大專院校學生，暑假到國內分行實習，最近仲搞咗個實習培訓班分享會，會上有同學問中銀香港副總裁林炎南求職之道，林生就送咗三個大錦囊畀同學。
首先係入職前考多幾個牌，做好裝備，提升自己嘅專業資格，因為𠵱家銀行瓣數多，又做資產管理，又做股票經紀同保險等，所以考個保險牌、證券經紀牌同財務分析牌包有着數。第二就係要任勞任怨，唔怕蝕底，好似佢剛入行加入廣東省銀行做嘢時，試過手頭上同時有成十樣嘢要做，但佢都頂得住。第三就係要有團隊精神，佢話銀行業唔需要個人英雄。
如果同學想入中銀，佢畀大家嘅貼士，就係先要對金融業有興趣，仲要做足功課，起碼中銀香港份年報要刨熟，而最重要就係要有誠信。誠信呢樣嘢，千年栽種可以一朝盡失，劉金寶事件之後，中銀香港高層對此最有體會。