三色台馬面小生雖然有老婆，但就爛滾都暈，不過佢老婆想同佢離婚，佢就死都唔肯，一來係為維持佢嘅形象，二來係為咗撇女時有最佳藉口，每次甩身都話唔捨得放棄個家，又話老婆要生要死，搞到啲女俾佢撇都唔敢嘈。關仁有個朋友DD都同佢行咗幾個月，DD話馬面同佢講，因為老婆出面有男人，所以夫妻感情麻麻，DD落叠後，想叫佢同老婆離婚，馬面小生當堂嚇到閃，又以仲愛老婆為由，要同DD分手。
惡人A叫藝人詐病
經理人「惡人A」不嬲都好識得幫旗下藝人造新聞，所以佢班藝人經常唔係呢度唔妥就係嗰度有病，其中有大半都係流嘅。惡人A試過夾埋雜誌寫衰佢個女，出街後惡人A就發惡狂鬧，仲話要發律師信告人，但私底下就打番畀個雜誌記者，話自己唔會出律師信畀佢，叫人哋唔使理，話係做樣㗎啫，見報之餘，個女又可以博同情。有時經理人受老闆壓力，話啲藝人冇乜noise，佢就會重施故技，同傳媒夾新聞。
藍精靈獅子開大口
俾人叫癲王嘅「藍精靈」，之前精神錯亂，大好前途盡毀，雖然早排佢好似正常番啲，積極搵嘢做，身邊都有好多人幫佢，可惜幫完佢嗰啲朋友都呻幫唔落。話說藍精靈早排想試吓做才女寫專欄，於是搵咗個男藝人幫佢同本雜誌搭路，點知藍精靈同人傾價錢嘅時候，竟然開口話要10蚊一個字，即係一篇1,000字嘅稿要收成萬蚊，嚇到人哋走夾唔唞，呢個價錢，搵真正才女寫都有凸啦！